3 Years ng Binubuhat ng Huwarang Lalaking Ito ang Kaniyang Kaibigan Papunta sa Eskwelahan Araw-araw Para Makapag-Aral!

Mayroong pagkakataon sa buhay ng bawat estudyante na nawawalan sila ng gana sa pagpasok sa paaralan. Maaaring ito ay dulot ng hindi magandang karanasan o di kaya naman ay masamang pakiramdam. Ganoon pa man, ang karamihan sa kanila ay hindi nagpapatalo sa ganitong kalagayan at  sinisikap na bumangon ng maaga para sa araw-araw na pakikipagbaka sa paaralan lalo na at sabik silang maabot ang kanilang mga pangarap sa buhay. 

Sa katunayan, kahit ang kapansanan ay hindi rin nagiging hadlang para matigil sila sa gusto nilang gawin sa buhay kagaya na lamang ni Zhang Chi. 

Nagkaroon ng komplikasyon ang mga paa ni Zhang at hindi niya na ito magamit sa kaniyang paglalakad. Sa kabutihang palad ay nagkaroon siya ng matalik na kaibigan sa katauhan ni Xie Xugang at dahil sa kaniya ay naipapagpatuloy niya ang pangarap na makapagtapos ng pag-aaral. 

Araw-araw ay sinusundo siya ng kaibigan sa kanilang bahay at sabay silang pumapasok sa paaralan. Dahil sa kondisyon ni Zhang, kinakailangan siyang buhatin sa likod ng kaibigang si Xie hanggang sa sila ay makarating sa loob ng kanilang silid-aralan na matatagpuan sa ika-tatlong palapag ng gusali. 

Mahirap ang kanilang sitwasyon lalo na at kailangan nila itong gawin araw-araw sa loob ng tatlong taon hanggang sa sila ay makapagtapos ng high school. Ganoon pa man, hindi ito alintana ni Xie dahil nais niya na sabay sila ng kaniyang kaibigan sa pag-abot ng kanilang mga pangarap. 

Noong una ay hindi pabor ang mga magulang ni Xie sa kaniyang desisyon dahil maaring makaapekto ito sa kaniyang grado sa paaralan. Ngunit pinatunayan niyang mali ang mga ito at mas naging maganda pa nga ang kaniyang grado dahil naging inspirasyon nito ang kaibigang si Zhang. Sabay nga silang nakapagtapos ng highschool at magkahiwalay man sa papasukang paaralan sa kolehiyo ay nanatili paring matalik na magkaibigan ang dalawa. 

Nakakatuwang makita na sa mga panahon ng ating kahirapan ay mayroon tayong mga kaibigan na handang tumulong ng walang hinihintay na kapalit. Ganito ang uri ng pagkakaibigan na natanggap ni Zhang mula kay Xie at nawa ang bawat isa sa atin ay magkaroon din ng ganitong klase ng kaibigan.




source: gtgoodtimes